防疫物資不足 李佳芯一格廁紙慳住用

李佳芯（Ali）、高海寧（高Ling）、黎諾懿與趙希洛昨日到油塘向長者派口罩。Ali早前因不夠口罩及廁紙而叫苦連天，她笑言現時物資已足夠，又自豪表示已學會慳住用廁紙。

李佳芯昨日首次落區派口罩，早前她行山時發現很多人棄置口罩，她說：「起初以為有人唔小心跌咗，原來好多都係用完被棄置嘅口罩，所以我決定同fans組團做義工，去郊區同山上清理垃圾，預計半個月內實行。」問男友陳炳銓會否一同參與？她笑說：「佢應該唔會一齊去，但我會問佢意願。其實做好事嘅話佢參與都無所謂，但希望唔好被人影到，因為想低調。」

Ali早前曾表示家中物資短缺，她回憶當時情況說：「最惡劣試過剩番三個口罩、兩卷廁紙，好彩嗰段時間唔使開工，我盡量唔出門口，減少用口罩，同埋都有用布口罩。」她笑說最難捱是不夠廁紙：「當時好大壓力，每次一格一格咁用，後來慣咗慳住用，例如清理鼻孔、或者抹嘴，都盡量用一格廁紙解決。」問她何時開工？她坦言仍未有劇開，而《白色強人2》暫定今年底開拍，但未知會否有變數。

高Ling取消關注男友IG

同場的高Ling透露，有感今年太多負面消息，所以上月起決定戒食肉，希望為社會及自己積福。不過早前她被發現取消關注男友鄧智偉的IG，因而傳出分手，她解釋此舉沒有特別意思：「佢（鄧智偉）一向都無follow我㗎啦，大家唔好放大件事，我一向唔會高調講私人嘢。（目前單身？）咁多年我都無答過。」

採訪︰Pauline

編輯：李潔盈

美術：梁政敏