《大醬園》「細么」設局殺人奸到出汁 龔嘉欣︰自己都唔敢睇番

首度演奸角的龔嘉欣（Katy），在前晚的劇集《大醬園》中勒死曾強姦她的劉星威（阮政峰飾），Katy在該幕戲大騷演技，令人睇到不寒而慄。她接受本報訪問時，直認不敢重睇該幕戲，並稱︰「初時唔想接呢個角色（細么），監製（梁材遠）勸我事業上係時候要突破！」有劇迷熱捧Katy的演出令人眼前一亮，更撑她在年尾爭視后！

熱播中的《大醬園》已踏入結局周，Katy飾演的細么由忠變奸，角色極具層次，她成為高專員（袁文傑飾）的姨太太後呼風喚雨，盡展其惡毒心腸。前晚劇情中，她對曾強姦自己的阮政峰十倍奉還，親手勒死對方，Katy投入演出，講對白時皮笑肉不笑，完美演繹「最毒婦人心」。

Katy昨午接受本報訪問時，透露拍該幕殺人戲的點滴︰「當時我哋拍到一半，因為民初戲有啲場口會放煙，但煙機壞咗又無後備，中間停咗兩個鐘，變咗場戲斷開咗，有少少擔心！」她回想拍攝時特別專心，全因該幕戲好緊要。

導演都話場面恐怖

Katy又坦承不敢重看該幕殺人場面︰「拍完導演都話好恐怖，唔知出唔出到街；自己都唔敢睇番。」談到網友熱捧她爭視后，Katy衷心感謝地說︰「初時抗拒演呢個角色，監製梁材遠說服我，指我在《包青天再起風雲》、《堅離地愛堅離地》、《幕後玩家》都係慘情角色，佢覺得我事業上係時候要有突破！角色（細么）又每條綫都牽涉到，拍攝時日日都開工！拍呢齣劇放假無超過十日，出到嚟有咁好成績都好感恩、值得！」

無諗收視 感謝觀眾

對於劇集收視，Katy指因疫情關係，現時很多人留在家中睇電視︰「我無諗收視去到幾點，最緊要觀眾鍾意及討論。」她亦相信觀眾會希望「細么」得到報應。

昨午，Katy也在IG上載穿上戲服的黑白照，並留言︰「對於細么，覺得可恨同時亦覺可悲。」劇中好拍檔吳業坤亦有留言「衰呀你。」齊齊在社交網谷劇。至於粉絲就讚賞Katy的演技大躍進；有視迷亦指她有力成為奸角專業戶。

此外，昨日無綫公布本月10日至16日的收視報告，當時《大》劇播映第16集至20集，七天跨平台總收視達29.5點，僅敗於正播映結局周的《黃金有罪》30.4點收視。

撰文︰Pat、Steven

協力︰Terri

編輯︰黃寶恩

美術︰Simon