狠批無綫掀熱議 耍冧求「降溫」 李國麟︰我真係為公司好

李國麟上月尾在一個專訪中苦呻，不少綠葉被無綫要求一年只簽六個騷難以生活，又狠批因管理問題令編劇無法創造好劇本。事件經過發酵，昨午他主動向傳媒澄清只是「愛之深、責之切」，強調未被公司照肺。不少劇迷撑這位老戲骨主動解畫；有粉絲亦希望在TVB繼續捧他的場！

昨日李國麟在電視城召開記者會為事件降溫，他直言有關訪問掀起的回響，實在令他始料不及︰「回響多到我驚，可能用我個角度去睇公司（TVB）有啲唔公平，公司好似畀我踩，如果我唔喺度，我就係踩，但我仍然喺呢間公司，我好愛呢度，但用錯方法，咁樣講搞到好多監製同製作團隊都好唔開心。」

他又指近年不少無綫劇集被網友狂踩，其實每位演員皆盡力拍好劇集，但難以控制觀眾意見︰「我唔可以代表觀眾口味，唔係TVB啲劇唔得，只係唔能夠合乎所有觀眾口味。（被高層照肺？）受壓係自己造成，我只是講件事，高層未照肺，但我相信公司會搵我了解。」他又稱︰「我做咗幾十年，真係愛呢間公司，為公司好，將來亦會繼續批評！」

合約明年中屆滿

談及「一年六騷」的綠葉制度，李國麟澄清TVB對他不薄︰「公司對每個藝員有唔同政策。」他坦言與無綫仍有一年半合約，剛剛完成劇集《逆天奇案》的拍攝工作。至於網民則認為他抒發情緒後要繼續拍劇；有粉絲亦期望「家和萬事興」。

事實上，李國麟於70年代已開始效力TVB，多年來擅演反派角色，令觀眾留下深刻印象，他曾演活《天龍八部》的鳩摩智、《男親女愛》的Alex鮑等。他在熱播劇《大醬園》亦是演奸角，相信觀眾都希望這位熟悉的面孔繼續有劇演。

撰文︰Steven、Pat

攝影︰林良明

協力︰Terri

編輯︰陳禮恒

美術︰梁政敏