日打4份工為追畫家夢 90後港女以嘟嘴Love Cherry宣揚愛

活躍於藝術界、曾在酒店開設個人畫展、參展新加坡Art Fair、師承沙畫大師海潮、參與各種舞台設計……如此履歷，以為是哪位年高德劭的藝術家，原來是本地90後年輕女畫家Jennifer Chow。她筆下角色Sad Cherry和Love Cherry最令人印象深刻就是那個嘟起的豐厚紅唇，原來是想向大家宣揚愛。

看似天生是藝術家的Jennifer，原來大學才開始正式學藝。「由細都好鍾意畫畫，但屋企比較傳統，覺得畫畫就係玩，一定要讀好書。我從來無參加過咩繪畫興趣班，有都係補習班。」但她深知自己將來是「要成為一個畫畫的人」，甚至在中學時放棄選修比較擅長的理科，只為了可以修讀視藝。

韓國之旅 萌生Sad Cherry

後來她決心追夢，不顧家人反對，投考了藝術學院。「當時為咗交學費，同時做4份兼職，真係好辛苦。但又好開心，因為可以做想做嘅野。」其中3份兼職都是教畫，能夠日日投入在自己的興趣中，睡得少也很滿足。

2016年，大概Jennifer畢業後3年，有一次她獨自旅行在外，成為了Sad Cherry出現的契機。「嗰時我一個人喺韓國旅行，咁啱無水無電，零下幾度夜晚一個人，又凍又餓，個人真係好sad，哈哈。」於是她在當地創作出了第一幅Sad Cherry。「個嘴係我跟住自己個嘴畫。其實我覺得Sad Cherry係我自己嘅反映。」

至於Love Cherry，則是在上年「出生」。「上年我畫Sad Cherry畫到情緒出現問題，因為畫畫時投放太多情感啦！後來諗，不如轉換下心情啦！就創作咗樂觀嘅Love Cherry。畫Love Cherry嘅時候，心情都係好感恩。」

姊妹角色 渴望愛與被愛

「其實佢哋係兩姊妹嚟㗎！Sad Cherry係家姐，Love Cherry係細妹。」Jennifer興致勃勃地介紹。「Sad Cherry好悲觀、無自信，乜都怕；Love Cherry就好樂觀、好正面，佢成日都諗︰『點解細妹咩都擔心㗎！』佢哋係兩個極端。」相同的是，兩姊妹都有一張嘟起的朱唇，這個櫻桃般的嘴巴甚至有一句slogan︰I am ready for kiss。嘟着的嘴唇代表對kiss的渴望，期盼被愛和被關心。Sad Cherry傷心地渴望愛，Love Cherry則快樂地給予愛。

Jennifer自覺是Sad Cherry，但筆者覺得她更似是Love Cherry。她現在定期做慈善活動，到社區進行探訪，不止在畫作上，更身體力行宣揚愛。早前她設計了一套美輪美奐的Love Cherry萬用利市封，也送出了不少到貧困家庭，是只送不售的非賣品。「我想畀多啲人知道，人唔係得一面，一定有高低起伏，有sad都一定有充滿love嘅時候。」正如Jennifer創作兩姊妹的原意。

撰文︰王寶欣

攝影︰林良明

編輯︰余運慶

美術︰梁政敏