賣樓拍《乜代宗師》黃子華自認傻佬

黃子華自編自導自演的賀歲電影《乜代宗師》將於本月23日上映，影片近日疑遭抹黑，有傳子華收取數百萬片酬，不但剝削其他工作人員，更要到深圳取景，一度遭網民發起罷看。

前日子華在FB開live逐一反擊傳聞，他澄清時語帶激動，最後更強顏歡笑︰「套戲係剝削所有人，每個人都畀我揼心口，唔該唔該，平啲平啲平啲，因為真係唔夠錢。我自己點呢？唔單止係一毫子都無收過，實情係我賣咗層樓，嚟拍呢套戲。」子華強調想自由自在拍一部給香港人看的電影，而不是合拍片，至於為何要到深圳取景？他解釋︰「我問過啲監製，我賣咗層樓可以拍15日，但我套戲要拍50日，都係錢嘅問題，所以只能夠行到呢一步。」他更自嘲全世界都覺得他賣樓拍戲是傻佬，而且亦預了蝕錢，輸少當贏。其實子華對上一次執導是02年的《一蚊雞保鑣》，當年票房成績差強人意，令子華成為票房毒藥，今次有望一雪前恥。