驚太太鬧爆 甄子丹唔敢同囝囝交手

甄子丹、張晉等主演的新片《葉問4完結篇》前晚舉行慈善首映禮，子丹一家總動員撑場。提到現年12歲的囝囝遺傳其好身手，子丹坦言做動作演員只是表面風光，加上一身傷患，所以不會刻意栽培兒子做接班人。

甄子丹早前揚言不再接拍功夫片，他前晚笑言會繼續拍動作片，兩者有分別︰「呢套戲（《葉問》）拍到第四集，最美好嘅都要有句號，之後就同功夫片say goodbye，呢集作為好好嘅留念。」原來子丹兒子James前日12歲生日，一家睇首映順道慶祝，子丹笑指囝囝已看過《葉問》系列頭三集︰「阿仔覺得我打得差，媽咪先厲害，仲勁過我。」提到兒子遺傳子丹的好身手，目前已是跆拳道黑帶︰「我都唔敢同個仔切磋，驚太太會怪責我。囝囝細個我有畀佢學唔同功夫，仲識混合格鬥。小朋友好多興趣，而且有天份，不過佢依家比較懶，會問可唔可以唔練，唔想起腳。」

問子丹會否安排兒子將來入行做接班人？他坦言不會刻意期望︰「個仔仲細，加上大家都知呢行係表面光輝，我拍咗咁多年戲，都受過好多傷，依家長期筋絡痛，有時連續出拳會痛，腰又企唔直，好似抽筋咁，加上年紀愈大會愈惡化，要keep住做物理治療，呢啲就係做動作演員嘅代價。」

張晉傷手難湊B

同場的張晉左手中指包紮着，原來他最近學習用穿越機拍攝時，不慎被螺旋槳割傷手指，幸好未有大礙，亦不影響湊仔。他說︰「依家暫時唔可以掂水，無得幫手沖涼，換片都有困難，但可以抱B。」提到細仔張樂兒已滿月，張晉笑言帶囝囝出街就像打仗般，因為要帶大量嬰兒用品。

撰文︰Pauline

編輯︰李潔盈

美術︰梁政敏