歌迷催婚 Stephy扮聽唔到

昨日是鄧麗欣（Stephy）36歲生日，一班歌迷會成員日前提早為偶像慶生，他們亦十分留意Stephy男友邱勝翊（王子），更乘機向偶像催婚。Stephy笑指自己飽歷風霜，早已習慣了，竟然做「聾耳陳」扮聽不到，認真鬼馬。

鄧麗欣日前與歌迷歡聚，慶祝Stephy「第二個18歲生日」，粉絲送上親手製作的生日蛋糕，又與壽星女大玩「估歌仔」和「歌詞接龍」等遊戲，不少忠實歌迷記憶力驚人，對Stephy的金曲倒背如流，令她驚訝不已。

Stephy已多年沒有跟粉絲一起慶祝生日，她表示：「見住大家一齊成長係好開心，年年生日願望都好簡單，真心希望身邊嘅人開心，其實健康同開心永遠都係無價，呢個願望永遠都會伴隨我，見到大家玩得咁開心，我已經好滿足。」至於生日正日當天，Stephy笑言「特瞓」閉關一天，她說︰「通常前一日慶祝，玩通宵後正日就瞓覺，休息一日。」

王子無時間陪Stephy慶生

是否與男友王子一起過生日？Stephy扁嘴表示︰「無啦，今年佢要做嘢，我唔知佢係咪講大話啦，應該唔係嘅，佢真係去做嘢，無所謂啦。」

有歌迷為Stephy的人生大事着急，乘勢追問她與男友的婚期，令壽星女哭笑不得。對於被催婚，Stephy續稱︰「我懷疑佢哋係臥底，今日好多歌迷無端端好官腔問我幾時結婚，我已經飽歷風霜，呢個問題畀人問咗十年，我習慣晒，所以當聽唔到，哈哈。」

撰文︰倪小珊

編輯︰陳禮恒

美術︰梁政敏