法國婚紗相曝光 陳山聰為太太送上難忘回憶

陳山聰將於11月1日與拍拖五年的女友Apple拉埋天窗，早前兩人飛到法國拍攝婚紗照，不過準新娘子被指肚凸凸兼刻意用手遮肚，疑似懷有身孕，難道是雙喜臨門？

43歲的陳山聰憑熱播劇集《金宵大廈》中飾演保安員阿蕭一角而人氣急升，首次做男一的劇集叫好叫座之餘，山聰亦即將迎接人生大事──迎娶女友Apple的大日子，屆時他會筵開十席宴請親朋。早前山聰與Apple特別飛到法國拍攝婚紗相，兩人流露出無限的幸福和快樂，山聰望住Apple的眼神簡直是甜到漏。

山聰表示︰「其實我同太太拍拖五年，我都無為太太做過啲咩浪漫嘅事，依家終於要結婚喇，所以我好想帶佢去一個好浪漫嘅地方影相補數。我相信法國係一個大部分女仔都會鍾意嘅地方，加上太太之前未去過法國，所以好想同佢喺呢度，影一輯靚靚婚紗相，成為我同佢之間一個最美好同難忘嘅回憶。」

好滿意婚紗相效果

山聰指今次拍攝婚紗相要多得一眾兄弟姊妹的幫忙，令他能夠用有限的預算，做到最佳的效果。問到婚禮的預算，山聰說︰「呢個美好回憶係唔可以用錢去衡量，只要係能力範圍內做到，一定要令太太開心。」不過多張婚照中，穿着高腰傘裙的Apple側身靠近山聰，刻意遮肚，而另一張黑白婚照，Apple更用右手撫摸微隆的肚子，被指疑似有孕，當被問到是否雙喜臨門，陳山聰笑笑口否認。

撰文︰倪小珊

編輯︰黃卉彤

美術︰梁政敏