尾場甩轆 林海峰提妻女狂食螺絲

林海峰（Jan）一連七場《林海峰是但噏HAPPY MONDAY 2019》前晚在紅館舉行尾場，好拍檔葛民輝及黃秋生擔任表演嘉賓。Jan前晚演出時竟老貓燒鬚，一提太太彭羚及兩個囡囡時即發台瘟，事後他苦笑說︰「生命中一定有少少遺憾。」

林海峰talk騷尾場吸引不少圈中人捧場，包括徐天佑、張繼聰與太太謝安琪、錢嘉樂與太太湯盈盈等。Jan本來在台上揮灑自如，但一講起老婆彭羚及兩個女兒即時食螺絲︰「佢兩個（19及15歲的女兒）變成非建制派，佢哋黨魁，即是『佢』太太…sorry，點解又係呢個位出錯，今晚仲要錄影。」結果到第四次才順利讀出台詞。

及後，Jan與黃秋生及葛民輝（阿葛）在台上合唱，期間秋生更用口琴吹奏《有隻雀仔跌落水》及《願榮光歸香港》，全場觀眾亮起手機燈大玩燈海。最後三人合唱《努力奮鬥加油》和《疾風》，邊唱邊跳，為尾場畫上完美句號。完騷後Jan受訪，提到失誤時說︰「現場演出一定有錯誤，生命中總有啲遺憾，撻低咗再起番身就得。」他指太太傳短訊給他，以羽毛球作比喻鼓勵他︰「錯失咗一分唔緊要，一分追番就得。」

黃秋生感激上紅館

Jan在台上大爆細女私事，會否擔心女兒生氣？他表示囡囡看過他的講稿，也要求刪去某些內容，相信囡囡不會生氣。至於好拍檔阿葛助陣，Jan取笑對方說︰「佢係全組人最早到，態度係滿分，大家唔好計較佢嘅表演水準，我都盡量縮短佢嘅演出時間，減低佢出事機會。」

Jan坦言每次開騷度蹺都有難度，但面對困難仍要做好，身旁的阿葛表示是「迎難而上」。秋生則感謝Jan讓他有機會踏上紅館︰「頭先見到一片燈海都呆一呆！」Jan提議秋生開個唱，秋生笑說如果在容納30人的場地開騷才會考慮。

撰文︰Pauline

編輯︰李潔盈

美術︰梁政敏

攝影︰林良明