老翁港鐵打尖「起飛腳」 忽然倒地網民揶揄「演技麻麻」

「周圍都有CCTV同手機，想屈人都要用下個腦」，有網民拍得一位白髮老翁懷疑於港鐵月台排隊時「打尖」，與在場多位黑衣人發生爭執，多次「起飛腳」將拍片者手機踢跌後更「插水」倒地，由港鐵職員勸喻「阿伯唔好吸地氣呀」仍不為所動，被網民揶揄「有氣有力，又會突然間暈低？」。

打尖老伯與黑衣人爭執「起飛腳」 

日前有網民於Facebook上載影片，據了解影片攝於港鐵北角站，該網民稱當時一位身穿藍色恤衫、佩戴斜孭袋的老翁因等車時「打尖」，被旁邊乘客要求重新排隊，惟老翁回應稱「我係咁㗎喇」，繼而與其他乘客起爭執互相指罵。影片中可見老翁與多名身處月台身穿黑衣者爭執，並至少兩度對持手機拍片者「起腳」，手機亦險被踢跌。

大叫「我無打人」 聞報警即「插水」

老翁踢人後仍然情緒激動，有多位黑衣乘客上前安撫，惟老翁依然連番大叫「我無打人」，有列車到達月台仍拒絕乘車離去，繼續與其他乘客爭執，口角之間老翁忽然跌坐地面，其他乘客見狀即大喊「咪扮嘢」、「影到晒喇」。有乘客主動上前檢查老翁情況並查問傷勢，港鐵職員亦於數分鐘後推輪椅趕至，了解情況後對老翁指

「阿伯唔好吸地氣呀，唔健康㗎。」

惟老翁至影片完結時仍癱軟躺臥地面，未有回應職員查問。影片上傳者於帖文補充指，

「郁手郁腳唔文明呀，打尖真係唔啱㗎...記住，周圍都有CCTV 同埋手機㗎。」

網民揶揄好武功「條筋仲鬆過我」

有網民對老翁一頭白髮仍身手矯健感驚訝，揶揄指「六十路譚腿！」、「條筋仲鬆過我」、「武術戲劇高手」。有人稱主動上前關心的香港人好心，「一見個老人家訓（瞓）低即刻關心咗先」。亦有人指其他乘客的急救方法不正確，戲稱「一齊唱Sing Hallelujah to the Lord」、「成班人同佢講『安心上路、下世投胎唔好再打尖』，應該即刻激返醒」。