新劇再現「丁蟹效應」? 秋官︰唔好賴我

鄭少秋（秋官）主演的ViuTV劇集《詭探前傳》正在熱播，一如以往播出秋官的新劇時，都巧合地遇上股市大跌，最近股市出現急挫，不少股民即刻諗起秋官的「丁蟹效應」，對於再被指影響跌市，秋官笑言大家不要賴他！

秋官前晚出席周年酒會，對於股市下跌茅頭指他是「罪魁禍首」，秋官笑言︰「股市嘅事唔好賴我，係特朗普搞屎棍，哎呀！乜佢咁惡都有㗎，丁蟹都搞佢唔掂，自從佢搞中美貿易戰後，股市一直大海翻騰，係咁跌落去。（係咪再跌才入貨？）應該可以入喇啩，不過我唔玩，哈哈！我哋嘅領導人會有辦法對付佢，所以將會平穩向上，五窮六絕七翻身，股市五月開始跌得好緊要。」記者笑問秋官為何不提醒ViuTV避開五月，之後才播新劇？秋官說︰「又唔係嘅，可能佢專登呢，有話題就有人留意，呢啲整定嘅。」他又表示與太太都好穩陣，從來不敢投機，但買「磚頭」又貴，所以選擇買藍籌，至少不會蝕到入肉。

阿嬌早前與蔡卓妍（阿Sa）結伴到日本東京旅行慶祝Twins成軍18周年，阿嬌表示此行發生不少蝦碌事，「我喺台灣飛返香港再去日本，所以兩日飛咗四轉。我負責book酒店，阿Sa book機票，點知佢以為去番佢住開嗰間酒店，擺咗大烏龍！」由於抵達東京已是深夜，她們只逛了通宵百貨店。

阿嬌砌Lego車送畀老公

提到賴弘國早前被影到獨自返台灣，阿嬌表示︰「其實嗰日我喺台灣，只不過我喺屋企砌Lego，老公同醫師開會食飯，佢攞住嗰碗湯係買畀我嘅。」阿嬌又指，花了三日砌好了一架保時捷Lego送給老公。

此外，楊千嬅最近忙於巡迴演唱會，稍後將到深圳、佛山和澳門演出，屆時可能帶埋兒子Torres去澳門。她透露巡演將至明年四月，希望香港是最後一站。

撰文︰Pauline

編輯：黃寶恩

美術：梁政敏