BB發高燒40度極品港媽懶理 拒帶兒子睇醫生拖足5日

小朋友生病可大可小，不少家長都為之著緊。然而，有女網民日前在網上抱怨其大哥、大嫂懶理9個月大的姪仔發燒，其大嫂甚至不肯帶BB看醫生，而在網上找偏方。最終，5日後BB發高燒至攝氏40度，家中兩老帶BB到診所時，醫生更立即指要帶BB入急症。令樓主「嘔血」的是，其大嫂得知後竟向他們稱：「你哋帶阿B去得唔得啊？我想喺屋企等你阿哥放工返嚟一齊食飯！」兒科專科醫生李家仁接受《晴報》訪問時指出，BB發高燒的背後原因不一，家長應盡早求醫以找出病因，放任不理後果隨時可大可小。

姪仔被帶到內地遊玩後發燒

樓主化名「人哋細妹」向Facebook群組「生仔要考牌系列」投稿，指大哥、大嫂本月4日帶9個月大的姪仔到內地遊玩，但回來後BB即發高燒，「星期一下午我哋打畀佢哋關心下，先知BB已經燒到39度，燒咗兩日，成家人都叫阿嫂帶阿B『炸炸臨』睇醫生。阿嫂死都話要再等我阿哥放工一齊去，而嗰時先中午2、3點。結果我阿哥放工返到嚟，樓下醫生已經Close咗，佢哋竟然又無睇！」

大嫂唔肯帶BB睇醫生反而網上搵偏方

至上周四（9日），她再致電大嫂關心BB情況，獲知BB仍在發燒，「我哋話不如去睇急症，阿嫂一時話上次醫生開啲藥未食晒，一時又話網上搵咗偏方，煮荷葉綠豆湯畀BB退燒（我心諗係咪痴X線㗎），再講又係話要老公陪先去，最後只肯畀我父母帶BB去睇多次診所（佢自己就留喺屋企）。」

BB高燒至40度要入急症

由於BB此時已燒至40度，醫生立即叫他們帶BB入急症。然而，當樓主與父母帶BB去醫院前，致電大嫂準備身份證等文件時，她竟向樓主稱：

「你上嚟拎完BB出世紙，你哋帶阿B去得唔得啊？我想喺屋企等你阿哥放工返嚟一齊食飯～ 」

樓主聽罷大嫂所言，不禁在文中最後「爆seed」：

「ROAR~~~~~~到底依個世界係咪有人會咁X痴線啊！？」

網民大罵：就黎燒壞腦仲等！

此事引來網民熱議，不少人均對樓主大嫂的態度及做法感到嘩然，「發燒唔睇醫生，大人都辛苦，何況係個BB？」、「帶BB睇醫生都要等老公陪，個B跟住佢都唔知點捱到大...」、「正常做阿媽自己拿拿臨半夜都會飛出去睇醫生，仲等乜鬼」、「咁都可以由得個仔燒」、「 等等等、就黎燒壞腦喇」、「 所以佢無你阿哥就出唔到街？」、「呢個仔遲早都係出事」、「苦了樓主和爺爺嫲嫲」、「 BB好可憐」。

此外，亦有不少網民認為樓主大哥不負責任，「問題係點解你哥又可以由得佢？」、「 阿哥呢？成件樹無出過場嘅？」、「其實你阿哥都好大責任」、「 兩公婆都不知所謂囉」、「父母唔識處理突發事件，都唔好生，害人害己」。

兒科專科醫生：越細應越早看醫生

兒科專科醫生李家仁接受《晴報》訪問時表示，兒童發燒的背後原因不一，37.8度已是發燒，39至40度便是高燒。家長應盡早帶子女求醫以找出病因對症下藥，「越細就應該越早去睇醫生」；若果放任不理，後果隨時可大可小，包括出現「燒壞腦」的情況。李醫生解釋，人腦主要由蛋白質造成，太高溫或會令腦細胞受損，情況猶如腦內蛋白質被「煲熟」，會令身體其他器官受影響。他又建議家長，一旦子女發燒，可開冷氣並調至24度替他們降溫，出汗後可以溫水抹身，切勿替他們穿厚衫「焗住」；若出現「打冷陣」的情況，則可替子女蓋多張被子。

中醫：切勿胡亂自行服藥

註冊中醫師嚴耀堅接受《晴報》訪問時指出，「綠豆荷葉湯」具有清熱解毒解暑的功能，但是不能退高熱。退高热的話，中醫一般會選用白虎湯，而且其中石膏的劑量需要根據患者的需要培增，才能達到降高熱的效果。也能退40度的高熱。但是，嚴醫師建議，患者如果有高熱，應先諮詢註冊中醫師，切勿胡亂自行服藥。