趕時間要求插隊畀錢 港媽：買咁多嘢都唔肯讓人

「排隊畀錢」乃是常識，而家長亦好應從小教導子女此自律的概念。有網民日前在便利店購物時，看到一名港媽帶同兒子前來買雪糕。該名港媽排隊付款時看到前面一名男子拿着一籃貨品後，竟以「小朋友趕住去上堂」為由要求讓她先付錢，但因態度不佳而被拒絕。豈料，該名港媽隨後竟邊排隊邊出言單打，該名男子於是先讓網民付款，並急中生智搞笑地反擊道：「唔好意思，一到7點太陽落山，我就會變人狼，我趕住返屋企費事嚇親你個寶貝仔！」

港媽要求男子讓她「打尖」遭拒

一名化名「路人甲」的網民日前向Facebook群組「生仔要考牌系列」投稿，指事發於本月4日晚上6時50左右，他當時正在便利店排隊付款，「當時得一個收銀，我前面有4個人，企我前面個男人拎住滿滿一籃嘢，大約30歲左右。」突然，一對母子進入便利店，「個仔大概小四小五左右，一入到嚟就大大聲話要雪糕，呀(阿)媽就話：『是但啦！快啲啦！遲到㗎啦我哋，xx uncle唔鍾意等人。』咁呀(阿)仔揀好之後呀(阿)媽就去排隊。」

惟1分鐘都未夠，該名港媽便衝上前，向樓主前面的男子稱：「先生，可唔可以畀我畀錢先？小朋友趕住去上堂！」男子猶豫了一下，港媽即時「黑面」並「發功」：「小朋友買杯雪糕唔阻你好多時間啫，你買咁多嘢。」男子見狀後，便拒絕其請求：「唔好意思，我都趕時間。」

港媽出言單打遭男子一句KO

該名港媽於是「死死氣」地返回樓主後面繼續排隊，但仍心有不甘大聲地出言單打：「買咁多嘢都唔肯讓下人，知唔知阻住好多人㗎，阻人發達猶如殺人父母呀。」、「都唔知有乜咁趕時間。」此時，終於輪到該名男子付款，「佢望一望我，見到我手上一包香口膠，就同我講話：『畀你買先。』」

該名港媽見狀後十分憤怒，「喺度睥住個男人」，男子此時轉過頭來向她稱：「唔好意思，一到7點太陽落山，我就會變人狼，我趕住返屋企費事嚇親你個寶貝仔。」男童聽到後望一望手表稱「仲有幾分鐘咋喎」，「嗰刻，我見到個呀(阿)媽成個頭都係問號，店員同我都忍唔住笑咗出聲」。

網民大讚男子「有型」

此事引來網民熱議，不少人認為港媽有問題之餘，亦大讚男子「有型」，「那位先生真係好正」、「那位男士EQ高又搞笑，就算那位媽媽要插隊都應該要問準排佢前面所有人」、「個呀(阿)媽態度好小小個男人應該都會讓比佢」、「正！背咗佢……一生受用」。另有網民認為，該名港媽不懂「教仔」，「阿媽應該要求小朋友完成課堂兼有好表現先考慮買雪糕，明知趕時間仲買！」