上月布吉秘婚 沈卓盈否認雙喜臨門

沈卓盈與從事內衣生意的男友Calvin拍拖三年，前日她Po婚紗相公布喜訊，但被踢爆已在上月16日於布吉低調完婚。榮升人妻的沈卓盈昨日穿小背心出席活動，透露老公在婚禮上自彈自唱送驚喜，令她感動到喊。

沈卓盈昨日戴上婚戒現身，心情大靚的她更不時派「心心」。提到她剛貼出婚照，迅即被爆已婚，她解釋說︰「本來想喺今日（昨日）白色情人節報喜，但唔緊要，都係開心事。婚禮喺布吉舉行，一直無諗住大搞，所以只係請咗雙方家人親友，我嘅姊妹團都係識於微時，包括何傲兒、何傲芝、徐淑敏、陳自瑤、黃芳雯同一位髮型師好友。」

是否雙喜臨門才急於結婚？她帶笑否認懷孕︰「你睇我咁fit、咁健康就知唔係啦，我比較傳統，鍾意按部就班。（婚後不設防？）呢刻我會專注工作先，生BB會隨緣。」提到婚禮當日的趣事，她表示設有接新娘環節，姊妹團準備了有蟲的茶整蠱兄弟，後來一眾兄弟亦屈服照飲。她說︰「老公有講愛的宣言，同埋佢畀咗好多驚喜我，放煙花又放天燈。最感動嘅係佢彈咗首《小幸運》畀我，佢本身唔識彈琴，但特登秘密練兵，唔怪得之前約佢食飯都話忙，所以見到佢表演，真係好冧好感動。」她自言行禮時拖住媽咪進場，已經強忍淚水，誰知老公比她更早喊。她又指暫未計劃在港補擺喜酒，現時只想好好休息。

認婚照做手腳

提到沒有將婚訊告知「少婦聯盟」的姊妹，沈卓盈表示完婚後才告知她們，但相信對方會明白。另外，她與老公在歐洲多處拍攝婚照，包括倫敦大笨鐘，有眼利網民指出大笨鐘在17年開始維修，但相中的景點卻沒圍板。她笑認曾經執相︰「啲相係上年年尾影，嗰陣大笨鐘係圍咗鋼條，攝影師好好心機執到好乾淨，我都好滿意。」

採訪︰Pauline

編輯︰李潔盈

美術︰顏玉玲