笑住賀菊梓喬被插浮誇 吳若希︰我做乜都衰！

吳若希（Jinny）與星夢同門師妹菊梓喬（Hana）屢傳不和，日前Hana奪《勁歌》「最受歡迎女歌星」時，Jinny即誇張大笑拍手祝賀，被指有幸災樂禍之嫌。昨日二人同場解畫，Jinny自嘲當晚「笑唔笑都衰」，而Hana強調自己當時腦袋一片空白，才會無表情。

吳若希、菊梓喬、周柏豪等星夢歌手，昨日為無綫拍攝賀年特輯。Jinny及Hana笑住合照，又齊齊為《勁歌》頒獎禮的表現解畫，Jinny說︰「我嗰晚嘅表現好精采！其實Hana攞獎前都傾過，我坐佢隔籬，做乜都衰，笑唔笑都衰，攬又衰，不過Hana無乜反應。」Hana解釋自己當時心情太激動︰「我成個人震晒，唞唔到氣，個腦一片空白，係過度興奮。」

Hana認未夠班奪「女歌星」

提到Jinny的反應被指太浮誇，她強調無嘲笑其他人︰「我係笑緊自己，又會被人影同寫我哋不和，以後我同公司申請，唔同Hana一齊坐，好辛苦，早知唔去頒獎禮！」她自言抱着睇騷心態出席頒獎禮︰「Hana喺我公司受歡迎程度好高，投票率大幅度拋離我，真心覺得呢個獎畀佢係值得，無咩問題。」

當晚Hana奪得六個獎，Jinny直言一心支持公司，自己不參加頒獎禮、無獎攞也沒所謂。問她在IG放大合照也獨欠Hana？她沒好氣說︰「Hana嗰刻行開咗，張相無佢唔代表不滿佢。」她更搞笑地伏在Hana膊頭扮喊，Hana即識做地拍她膊頭「安慰」。

至於Hana得女歌星獎惹來網民負評，她自認未夠班︰「我明白網民點睇，一切都只係僥倖，無僥倖就無Hana，我只係咁啱好彩，唔覺意攝到位。我無諗住同任何人比較，都係做好本份。」獎項被指似勤工獎？她說︰「咁我又真係勤力，好珍惜機會，因為我真係起步太遲，想追番啲時間。」

撰文︰Pauline

編輯︰李潔盈

美術︰梁政敏