戲癮大發 李克勤自薦扮樹

李克勤近日為賀歲片《廉政風雲煙幕》獻唱電影主題曲《活埋》，而近年鮮有拍電影的克勤，更向導演麥兆輝毛遂自薦，期待將來可以在對方的電影上參演一角，克勤笑言︰「扮棵樹、路人甲都可以。」

李克勤今次同時演繹粵語和國語主題曲，直言感到責任重大。他說︰「以前錄音，只要自己滿意，監製收貨就得，但今次電影係賀歲大片，希望宣傳上可以幫到手，最緊要導演、監製都肯收貨，好彩錄音時佢哋無嚟監場，否則壓力仲大！」

最想挑戰奸角

提到為電影獻聲，可有勾起克勤的戲癮？克勤直言︰「拍戲可遇不可求，無論演員遇到角色，抑或歌手遇到一首歌，每次都係機會、緣份。我都好期待喺演戲上同麥導演合作，扮棵樹、路人甲都可以，或者佢啲戲不嬲都有好多警察、CID，有無啲散仔（角色）啱我做？」

克勤形象正面，之前經常演正派人物，其實他心底渴望挑戰陰暗奸角：「如果要喺呢套電影嘅角色當中選擇，我最想演殺手，但驚說服力唔夠大，所以我會揀做關鍵證人。話明『關鍵』，即係喺戲中擔當重要角色，但又唔使太重戲，做少少、成效多多。」對於克勤自薦，麥兆輝笑道︰「考慮下啦，有啱嘅角色會搵佢。雖然克勤演過好多戲，但多極都係少，佢喺演戲上仲有好大發揮空間。」

撰文︰倪小珊

編輯︰李潔盈

美術︰梁政敏