馬明情侶檔搵錢 黃心穎唔學「翠蕭」秘婚

馬國明與黃心穎、陳展鵬與單文柔、鄭俊弘與何雁詩及謝東閔與朱智賢，前晚在將軍澳雙雙對對出席商場除夕倒數活動，馬明與女友心穎公開打情罵俏，不過心穎坦言將來結婚，不會效法蕭正楠與黃翠如般秘婚。

馬國明前晚在台上開金口唱歌，黃心穎見到男友緊張得滿頭大汗，立即上台為他抹汗；到心穎獻唱時，馬明亦識做上台獻花，公然大放閃光彈！原來今次已是他們第二年以情侶檔姿態出席倒數活動，馬明坦言最開心情侶檔出騷︰「年年都係咁就好，新一年計劃？都係努力工作啦。」

問馬明可效法蕭正楠與黃翠如般秘密結婚？馬明大讚︰「我覺得佢（蕭正楠）好型喎，當晚（台慶頒獎禮）佢贏晒，我好欣賞佢。」不過心穎聞言笑說︰「人哋做過嘅嘢我唔會做㗎，我要再勁啲！」

單文柔開心陀B升Cup

同場的陳展鵬在活動上細心傍實孕妻單文柔，目前懷孕五個月的單文柔早前在網上張貼BB裙相，但她否認陀B女，解釋只是BB車的圍邊，至於胎兒性別，二人笑言要遲些才公布。問到懷孕後可有鬧情緒？單文柔坦言有時會𤷪𤺧，但陳展鵬笑言不覺太太脾氣變差，兩公婆更會一齊做運動。單文柔胖了兩、三公斤，問她上圍可有升cup？她笑說︰「做媽媽最自豪就係升cup，好開心！」

眼見同場其餘三對情侶、夫婦甜蜜恩愛，緋聞男女謝東閔與朱智賢前晚依然否認戀情，強調只是好友，朱智賢說︰「我哋係熒幕情侶。（男方欠缺甚麼？）誠意！呢樣好重要，要做多啲畀我睇。」

撰文︰Pauline

編輯︰李潔盈

美術︰梁政敏