退休唔講棟篤笑 黃子華另有大計

黃子華昨日與應屆港姐出席「高錕慈善基金」活動，鼓勵大家多關懷腦退化患者。隨着子華完成廿多場棟篤笑後，他笑言已正式「退休」，卻又透露目前正構思一項新計劃，希望2019至2020年實行。

黃子華在台上笑稱已經退休，不再講笑，說話會較嚴肅。但當提到香港人口日漸老化，家人應多留意長者，子華更提出口號「例牌乜嘢凍定熱，唔想唔計唔開心」，教大家測試老人家可有出現腦退化症徵狀，不失其幽默一面。子華表示家族中有長者患有腦退化症，讓他留意到一些徵兆，他說︰「超過75歲嘅老人家當中，六個就有一個患腦退化症。起初以為情緒唔好，但可能開始計數唔叻，打牌都唔識計番，會好𤷪𤺧，我哋應該關心多啲老人家，同埋係有得去檢查！」

談到近況，子華透露正忙於籌備一些計劃，將於明年或後年實行。問到是甚麼類型？他笑言︰「都係演藝事業，我走唔出呢行，唔會突然走去做上市公司主席。（聖誕要閉關？）退咗休嘅好處就係唔使閉關，但都會照度嘢。」不過，他講明一定不是棟篤笑，「已經𠺘咗口，係棟篤笑以外嘅嘢。（以後唔再講笑？）會做啲高級啲嘅幽默，都係令大家開心嘅事。（同農夫合作？）睇佢哋考唔考慮我啦，我唔想拖累佢哋事業，人哋事業如日方中！」

不支持門票實名制

對於政府考慮以實名制打擊黃牛黨，子華表示不同意實名制，「始終對私隱權有侵犯，但同意立例檢討，因為現時對黃牛飛嘅管制非常寬鬆，好似無任何監管咁。如果問點解可以炒樓、炒iPhone，唔可以炒飛，我都答唔到，但就應該要檢討。（要重罰？）適當地啦！唔通炒飛要笞刑咩？」

同場的港姐冠軍陳曉華，前晚在《歡樂滿東華》順利完成空中繩索表演，她表示︰「之前排練時手腕受傷，其他幾個女仔都受傷，好擔心做唔到，點知正式表演總算順利完成，真係好感動。（楊盼盼訓練好嚴厲？）佢好緊張我哋，見我哋受傷，好似媽媽咁捉實隻手呵番三分鐘。」

採訪︰Pauline

編輯：陳禮恒

美術：梁政敏