慶祝53歲生日 城城獲一世任食麻辣火鍋

天王郭富城（城城）是圈中數一數二麻辣火鍋愛好者，快將牛一的他昨日出席麻辣火鍋店開幕時，獲大會送贈「一世免費任食」貴賓卡作生日禮物，令無辣不歡的城城開心不已！

城城昨日被封為「麻辣火鍋達人」，他笑言受之無愧，更表示︰「每次我食辣都諗起爸爸，以前同佢食宵夜或者煮飯，都一定加辣，簡直係無辣不歡，養成我都鍾意食辣！」經常到內地工作的他，經常獲接待人員安排食麻辣火鍋，更試過食火鍋食足一星期。

問城城可有考慮過投資開設火鍋店？他坦言工作太忙未能成事︰「始終做飲食要親力親為，所以我負責食好啦。」提到太太方媛是否一樣愛辣？他笑說︰「好似我食得辣啲，但屋企人會陪我食，太太都食得少少辣。」盛傳方媛正懷第二胎，問她現時是否不能吃辣？城城只說︰「唔會，佢都食少少。」

廣州個唱加開一場

提到本周五便是城城的53歲生日，他表示會留港度過，但當日仍要工作，以及忙於為下月廣州個唱綵排。他說︰「本來廣州只開11月24日一場，但反應好好，所以加開25日一場。其實開演唱會嘅時候，仲多時間陪屋企人，因為會留喺香港綵排。」至於生日願望，他希望身體健康、工作順利，問到可會追多個BB？他說︰「呢樣我都講過等上天安排，順其自然就得。」

採訪︰Pauline

編輯︰李潔盈

美術︰梁政敏