八旬母親病危 黃秋生：望佢舒服離開

黃秋生昨日在葵涌拍攝港台劇集《火速救兵IV》，秋生透露現年80多歲的母親病危，前晚拍戲期間更收到醫院電話，要趕往探望母親。他坦言已有心理準備面對，唯一心願只是想母親安詳離開。

黃秋生與張松枝昨日穿上消防員黃金戰衣，拍攝《火速救兵IV》的救火場面。在劇中飾演消防總長的秋生，表示本因家事推掉劇集，但劇集副導演「喊住」求他，成功打動他客串演出。秋生感嘆這兩天開工拍劇猶如「整定」：「因為媽媽身體唔太好，噚晚（前晚）收到醫院電話叫我趕去，結果最後一場都無拍到。」

問到黃媽媽是否患老人病？秋生說：「好多毛病，腎功能衰退、唞唔到氣、去唔到水，情況唔係咁好，只係等緊時間。」他坦言擔心媽媽，開工心情難免受影響，但明白無得驚，每個人始終要面對身體衰退：「我得一個希望，係想佢（媽媽）舒舒服服（離開），唔好咁辛苦。佢意識唔太清晰，相信佢只剩聽覺同觸覺，都寧願係咁，有意識會更加痛苦。」

沒打算為父立碑

提到秋生三個兒子有否探望嫲嫲？秋生說：「佢哋全部唔喺香港，要返學讀書，媽媽見咗都唔知，佢最想見嘅人係我。」另外，提到秋生早前往澳洲拜祭生父，但父親只獲葬在後花園，連墓碑也沒有，問他會否再安排安葬父親？他說：「排隊都唔輪到我，我有家姐同大佬，我係阿四。同埋已成定局，安安穩穩就算。」

撰文︰Pauline

攝影︰林良明

編輯：李潔盈

美術：梁政敏