處男執導賀歲片 王祖藍：想推廣粵語電影

王祖藍首次執導的電影《你咪理，我愛你！》前晚舉行煞科宴，祖藍與太太李亞男、毛舜筠、王菀之等均出席。祖藍表示電影是久違的廣東話歌舞片，自己很想做好本土香港電影，更希望原聲在內地上映。

王祖藍前晚獲太太李亞男陀B撑場，他對電影充滿信心：「我夠膽講一定好笑！有毛姐（毛舜筠）唱歌喎，仲有Sammi（鄭秀文）做師奶，今次套戲有成60個演員，最特別唔只係過鏡，而係個個都有故事。」李亞男坦言因大肚未能參與演出，但跟腹中BB每日陪伴祖藍剪片。

提到明年賀歲檔期對手強勁，除了林敏驄、彭浩翔等的電影外，更盛傳有《喜劇之王2》，祖藍笑說：「唔緊要，因為香港幾十年都無一套廣東話歌舞片。」電影會否在內地上映？他說：「未必喺新年檔期上，我想推廣粵語，最想用原聲加字幕喺內地上映。不過呢套係歌舞片加兩性喜劇，內地上畫難度都好大。」擔心內地票房？他說：「今次主要係做一部好本土嘅香港粵語賀歲片，香港係我第一個要嘅市場。」

毛舜筠曬「巨胸」

另外，祖藍透露毛舜筠在戲中會裝50G驕人上圍，效果驚人；毛毛表示與曾志偉再演夫妻：「我哋第七次扮夫妻，但今次我哋唱歌已經夠好笑，仲要用粵劇腔！」

撰文：Pauline

編輯：李潔盈

美術：顏玉玲