Sammi泳裝影封面 安仔︰好嘢唔怕攞出嚟

許志安、甄子丹夫婦及蘇麗珊等前晚出席環保電影短片首映禮，安仔提到太太鄭秀文（Sammi）早前泳裝上陣拍攝唱片封面，安仔大讚老婆影得又靚又有型，自己絕不呷醋。

Sammi曾表示影完泳衣照後，有給安仔過目，安仔聞言笑說：「佢着乜都唔使我批准，更何況好嘢當然要拎出嚟，唔靚就話怕分享啫，夏天唔通着樽領咩。」問他可會着泳褲影新碟封面呼應Sammi？他笑說：「咁即係我着西裝襯泳褲，去鬧市busking？我驚未唱已經被人趕走。」

提到前晚的環保影片，近來經常出海滑水的安仔，留意到海面有不少膠樽及垃圾，令他意識到環保的重要：「我依家習慣自備水樽、飯盒，雖然唔知幫到幾多，但唔做一定唔好。」

甄子丹唔用飲管

而甄子丹笑言，太太汪詩詩每天都向他灌輸環保習慣：「我出去拍戲，太太幫我準備餐具，我哋會呼籲劇組棄用膠餐具，亦盡量唔用飲管。」蘇麗珊大學時就讀環境工程與可持續發展學系，她自言當初想參與綠色和平的工作。

撰文︰Pauline

編輯：李潔盈

美術：梁政敏