大家平日與家人相處得多，一齊去旅行又試過未？有男網民日前在網上討論區發文，指自己與母親正在日本東京展開7日的自由行之旅，惟母親化身「百彈齋主」，猶如「港女」般嫌三嫌四，令他感到無奈兼疲累，更形容整個旅程為「玩命」。
樓主表示，他今年20歲頭，母親則50歲尾；母親自上次與親戚去過大阪後，就心思思想去多次日本，於是就叫他帶自己去，「咁我之前都無同佢去過旅行嘅，本身諗住一家四口去啦，點知另外兩個唔去，咁我就要自己一個單拖啦」。他指自己本身不太想去，「但念在咁耐都無同佢去過旅行，盡吓孝道啦，點知係旅程未開程之前佢已經不斷煩我」。
他指出，母親在出發前已問過不停，如問他「浸溫泉係咪要着泳衣」；當他解釋當地規矩是全裸浸溫泉時，母親則反駁指電視節目主持可用毛巾遮掩，他只好回應：「咁你而家拍電視做主持人咩？」此外，母親除指「唔食海鮮嗰啲」外，又列出各種不喜歡的日式食物，但樓主問「咁你有啲咩想食」時又稱「唔知喎」、「所以幾時都係中國菜好」，令樓主十分無奈。
到達東京後，樓主指母親即化身「種族主義者」，取笑日本人、外國工人及遊客，甚至在見到黑人後即時戴上口罩。上車到市區時，樓主拿出在便利店買的飯糰來吃，但曾表示「唔餓」的母親竟稱「點解唔買多過俾佢」、「我而家上咗車覺得餓」。其後，母親繼續嫌三嫌西，「間房好細囉」、「條街好多垃圾囉」、「我覺得日本啲餐廳動作好慢」，更稱「下次唔好預我啦」。當樓主稱「我覺得日本啲空氣好過香港」時，母親竟反指：「你唔好崇外啦！」
對此，樓主慨嘆：「我已經幻想唔到我呢幾日仲要聽多幾多次呢啲令我反白眼嘅說話！我想好好享受呢個旅程！」此事引來大批網民留言，均表示感同身受，「我明呀樓主」、「我媽又係咁，我仲要去得長過你」、「去親旅行佢地（父母）都嫌呢樣嫌嗰樣」、「自由行做搞手慘過返工」，又指同家人去旅行最好跟團。另有網民勸樓主放開懷抱接受，「他朝一日雙親行先一步，到時你想陪都冇得陪」、「捱左幾十年養大你，陪佢地見識下呢個世界，周圍輕鬆行下啦」。