《延禧攻略》近日熱播，劇中唔少宮廷鬥爭嘅橋段中，涉及到一啲中醫理論。當中女主角魏瓔珞喺幫懷孕嘅愉貴人搵出想害佢流產嘅兇手時，就曾大膽講出「枇杷老葉無毒，但枇杷新葉有毒」嘅理論。咁到底，呢啲所謂中醫理論堅唔堅㗎？
新葉老葉皆無毒
就「枇杷老葉無毒，但枇杷新葉有毒」之說，註冊中醫嚴耀堅指出，枇杷並無新葉或舊葉有毒之說，孕婦亦可適當服用。枇杷葉為薔薇科常綠小喬木植物枇杷的葉，全國大部分地區均有栽培，主產於廣東、江蘇、浙江、福建、湖北等地。其性味歸經為苦、微寒，歸肺、胃經，功效為清肺化痰止咳、降逆止嘔。據《本草綱目》中記載：「和胃降氣，清熱解暑毒，療腳氣。」、「枇杷葉，治肺胃之病，大都取其下氣之功耳。氣下則火降痰順，而逆者不逆，嘔者不嘔，渴者不渴，咳者不咳矣。」
中大中西醫結合研究所及中醫學院客座副教授、註冊中醫師林冠傑亦表示，枇杷新葉或舊葉均無毒，但枇杷葉新鮮的止嘔力較好，曬乾備用後則對止咳更好。不過，枇杷葉並非愈舊愈好，舊葉容易破爛，植物芬香油會揮發走，失去藥用功效。此外，由於枇杷葉性味歸經為苦、微寒，身體寒涼者不宜服用，孕婦應中病即止，普通人士亦不宜大量服用。
貝殼粉都好有用
另外，劇中有人將皇后娘娘送俾愉貴人嘅珍珠粉偷偷換成貝殼粉，以圖傷及愉貴人腹中胎兒；除咗有指珍珠粉應該係純白色、貝殼粉則泛黃外，更有「貝殼粉不僅以次充好，還能害了娘娘」一說。對此，嚴醫師表示，真嘅珍珠粉顏色應該係略為發灰或發黃，且應有淡淡嘅腥味，特別白嘅好可能係添加咗滑石粉。珍珠粉與貝殼粉原為一體，在成分上極為相似，目前尚無非常好嘅檢測辦法進行甄別。所以，貝殼粉其實都好有用，並唔會害人，亦並非孕婦禁用藥物。
林醫師則指，中醫經常會用貝殼粉入藥，牡蠣（蠔殼）、石決明（鮑魚殼）、瓦楞子（蚶殼）等都屬貝殼粉，均有軟堅散結之用，但各者亦有各自的功用；惟孕婦需慎服，誤服有機會會滑胎。至於珍珠粉則為珍珠末的粉，可鎮定安神、護膚，但因含水銀，故孕婦不宜大量服用。
圖片來源：網上圖片