合作開騷親如一家人 許冠傑未見過阿倫囝囝

一連11場《阿Sam &阿Tam「Happy Together」演唱會2018》Part 2前晚在紅館圓滿結束，譚詠麟（阿倫）及歌神許冠傑（Sam）合作無間，彼此已親密得如一家人，阿倫更試過幫阿Sam湊孫，但阿Sam大爆至今仍未見過阿倫兒子譚曉風。

將於本月23日68歲牛一的阿倫，前晚在個唱上收到不少歌迷的生日利市，他開心答謝大家提早為他慶生。二人在台上大談港人長壽秘訣，笑言第一位的方法是唱歌和聽歌，因此叫觀眾一起唱歌，又承諾為觀眾唱多幾十年。

阿倫及阿Sam完騷後接受訪問，阿倫坦言不捨得個唱完結：「唔捨得都無辦法，因為都做咗Part 1同Part 2，不過我哋12月會去新加坡巡唱，之後去馬來西亞同內地，美加就傾緊。」他笑言大家合作多時，早已合體成為一家人，他更幫阿Sam湊孫，大讚阿Sam孫兒十分可愛。問阿Sam可曾見過阿倫囝囝譚曉風？阿Sam笑說：「暫時未有機會，我只睇過相，好靚仔，但未見過廬山真面目。」阿倫表示兒子在外地工作，所以未有機會見面。

生日放肆亂食

問阿倫如何慶祝生日？他透露將會身在外地慶祝，是否去探囝囝？他即說：「多謝關心，下個星期放假㗎啦，可以去亂食嘢。」記者拜託阿Sam代為查問阿倫行蹤，阿倫聞言即對阿Sam說：「我連你都呃住先！」阿倫又表示獲阿Sam太太送上一籃朱古力，搞笑指可能是Sam太太嫌他太瘦。

撰文︰Pauline

編輯：李潔盈

美術：顏玉玲