打流感針有共識 張繼聰護妻：都係為仔女着想

謝安琪（Kay）上星期因一段對流感針睇法的錄音，惹起不少風波。老公張繼聰前晚出席首映時表示已立刻呵番Kay，同時力撑太太目的只為家人健康着想而已。

張繼聰前晚出席賀歲片《棟篤特工》首映禮，被問到太太Kay的心情已經平復？他表示事情已過了幾日，事件發生後他已經立刻錫番。「有趣嘅地方，就係引起大家好多嘅諗法同話題，起因係太太只喺私人群組對話，絕對唔係公開場合對答，只係媽媽之間傾偈，繼而產生討論。」阿聰表示自己和太太在注射疫苗方面是有共識的。

睇過唔少相關資料

阿聰又指醫生為保障大家的健康而努力，但每人對西方醫學仍有不同睇法。「雖然我拍緊戲，但都知老婆花咗好多時間去睇相關醫學資料，我哋明白科學上經常有好多新發現，我作為老公知道佢睇好多資料，始終打啲嘢入身體，都要為小孩着想。」問他可覺得政府及相關部門反應過大？阿聰則不予評論。不過，有人指Kay並非專業人士就不應該多談，他說︰「咁18歲前都無人專業，咁樣世界好悶。我覺得對世界上嘅事可以了解多點同提出疑問。」

他又指太太對攻擊性留言不會放在心，今次事件上亦很理性處理。他重申最重要是問心無愧，太太只想大家身體健康而已。最後他認為毋須抽出流出錄音的真兇，只希望外間不要再有任何誤會。

採訪︰Pauline

攝影︰林良明

編輯：林梓添

美術：梁政敏