感激老公配合 楊怡開Turbo造人

無綫重頭劇《再創世紀》前晚在尖沙咀舉行煞科宴，一眾演員郭晉安、楊怡、周麗淇、林文龍及袁偉豪等出席。與羅仲謙結婚一年的楊怡，自爆拍完劇後展開「造人」計劃，還讚老公做「柴可夫」絕對稱職。

楊怡前晚被問到拍完劇是否全力造人？她笑說︰「一直都Ready，不過呢排拍劇日日都要凌晨四點起床，收工返屋企已經好攰，要調理下身體先。」

不過她坦言沒有刻意尋找生仔秘方，反而身邊朋友主動介紹中醫給他。問到老公是否願意配合？楊怡表示︰「配合，佢仲係一個好好嘅司機，呢個幾月我日日開早，佢每朝四點鐘就起身載我返工，佢可以堅持到咁耐真係好有毅力同耐力，真係好抵讚！」

安仔笑稱要執樣

郭晉安則笑言與楊怡合作後要去整容︰「因為拍得好開心，成日都笑，笑到多咗好多皺紋，連個口都笑到大咗，聽日約咗整容醫生去整容。」安仔坦言拍劇多年從未試過遇到一個好拍檔，合作得這麼開心。問到他有沒有向楊怡傳授生仔秘方？安仔說︰「唔使，佢哋叻仔、叻女嚟。」

安仔又透露與家人到日本過白色聖誕，明年中才再開劇。「希望可以有長啲時間去準備，仲會去學唱歌，（想再做歌手？）唔係要再闖樂壇，係對自己嘅要求，希望自己唱歌方面有進步。」

撰文︰Pauline

攝影︰林良明

編輯︰林梓添

美術︰梁政敏