《俠盜聯盟》首映迎「天鴿」 劉華答謝500粉絲撑場

劉德華昨晚與馮德倫及舒淇等出席電影《俠盜聯盟》首映，這次是他在泰國拍廣告傷癒後首度在港公開露面，華仔透露傷勢已康復95％以上，但脊骨有兩節斷裂，要一、兩年時間慢慢復元。華仔又指現階段已可以做劇烈運動，但坐骨受損位置要小心保護，也只能夠有物理治療師在旁時，才可以做壓腿動作。

華仔昨晚與《俠》片女主角舒淇及導演馮德倫到九龍塘出席首映，吸引約500人圍觀，大部分是華仔的粉絲，有粉絲更舉起「王者歸來」的橫額及電影海報作支持，當華仔出場時，現場氣氛高漲，風騷的華仔笑言︰「你哋盡情叫，你哋好耐無叫過喇！」他又問粉絲︰「由今日開始，我日日都出來好唔好？」引來粉絲尖叫連連。而馮德倫被問到找華仔拍戲有甚麼難度？他直言最重要拍到華仔有咁型得咁型，華仔即笑說︰「賊嚟講自己算係最靚仔有型，我都唔知點解自己咁有型咁靚，演技有得練，靚仔真係無得練！」此言一出，令全場爆笑。

對騎馬有陰影

華仔對於粉絲的熱情舉動坦言十分感動，問他有甚麼說話跟粉絲說？他眼濕濕向粉絲報平安︰「我無嘢喇！今日希望畀fans見下自己，佢哋擔心咗我好耐，依家可以安樂。」他透露為了盡快出院，住院期間曾搏命做復健︰「我屋企有28級樓梯，為咗可以返屋企，我每日要來回行夠120級。」早前華仔曾透露要抱女兒劉向蕙，所以積極做深蹲及舉啞鈴，他昨日稱自己受傷四個月後已可以抱抱愛女，華仔謂︰「其實返屋企前要學好多嘢，好似坐輪椅、沖涼等，確保可以照顧到自己，因為屋企得我一個男人。（囡囡心痛你受傷？）心痛㗎！」

他續指事件發生後對馬匹存有陰影︰「我都有諗過日後拍騎馬戲點算，係咪可以用電腦key個樣上去，或者搵替身。」華仔表示幸好受傷後只影響演唱會，不過已計劃明年下半年到內地開騷，香港騷則希望明年或後年舉行，最好是跨年演出。

採訪︰Pauline

撰文︰Pat

攝影：林良明

編輯︰林梓添

設計︰梁政敏