北上演舞台劇勁緊張 楊怡怕謙仔驚喜現身

近日胡定欣與陳展鵬的「戀情」爆出被落選港姐單文柔介入，楊怡日前出席活動談及此事，但她重申不會八卦，反而與老公羅仲謙繼續曬恩愛。

楊怡昨早現身大潭出席奧比斯慈善步行活動，與現場人士做熱身操，穿上露臍裝的楊怡，做早操時經常按住件衫，事關昨日天氣轉涼，她笑言肚臍千祈不要凍親。

老公羅仲謙（謙仔）目前正身在內地拍電影《西遊記：女兒國》，楊怡表示老公大約四月中拍完，不過到時又輪到她去成都演舞台劇，倘若屆時謙仔夾到檔期都會去探班。問到今次老公會否再送上驚喜？楊怡謂︰「唔好嘥錢，上次首度演出好緊張，所以佢神秘獻花，雖然今次壓力無咁大，但知道佢神秘現身，我會好大壓力，所以佢同屋企人都唔會睇首場。」

祝福展鵬有拖拍

對於陳展鵬和單文柔有新戀情，不少人都替胡定欣感到不值，楊怡表示︰「好少見到定欣，佢開拍緊《宮心計2︰深宮計》，如果展鵬有新戀情，我恭喜佢，我覺得朋友之間唔好八卦，不過定欣都好忙，邊有時間拍拖？」

早前楊怡親自炮製芝士蛋糕給奶奶食，她笑言︰「因為奶奶生日，第一次整，翁虹知道我整蛋糕，以為我開舖頭，仲問我訂兩個蛋糕，於是我覆佢會2046開，到時會搵佢剪綵，哈哈！我仲係初級仔，唔見得大場面。」

撰文︰Pauline

編輯︰林梓添

設計︰梁政敏