苟芸慧認陸漢洋見家長

苟芸慧昨日到西環一田超市擔任開幕剪綵嘉賓，更下廚炮製心形牛扒，正當她整理伴菜之際，突然問男司儀︰「男人係咪覺得女仔着圍裙係最性感？」對方登時呆了不懂反應，令全場爆笑。

苟姑娘受訪時表示，有時也會炮製心形牛扒，可惜仍未有適合對象。情人節將至，問到可有異性約會？苟姑娘直截了當說︰「簡單啲約朋友一齊食飯，（佢哋全部有家室喎！）哈哈，搞到我好尷尬，或者同四個月大姪仔慶祝囉，我當佢情人㗎！（咁緋聞男友陸漢洋呢？）無呀！應該好忙。（仲了解緊？）係需要時間了解。等影到有個人陪我shopping就係嗰個。」

記者隨即指她早前被拍到與陸漢洋辦年貨，苟姑娘即詐傻反問︰「有啲咁嘅事？我都鍾意男仔陪我行Grocery（雜貨店），佢幫手揀食材就睇到係咪細心。（陸生係咪夠細心？）細心，識佢嘅人都知佢好細心。」

自爆多人追

既然被拍到與陸漢洋辦年貨，是否就認定是男友？苟姑娘即推說等下次再被影到才算，她又表示要是認定了，一定公開戀情。瘦身後的她還自爆近日多人追求，喜歡賽車的她更直認同樣愛賽車的男士會加分。苟姑娘又透露陸漢洋曾到她家中拜年，父母對他的評價不俗，讚他夠細心，問可有乘機催婚？她說父母明白這些事不能急，而她亦會以結婚為大前題揀對象。

此外，提到前緋聞男友郭富城女友方媛傳懷孕，苟姑娘表示若是事實，一定恭喜他和送上祝福。

採訪︰Pauline

編輯︰黃寶恩

設計︰梁政敏