拍廣告分飾多角仲玩反串 阿Bob曬港式韓語寵寵寵 粉絲：笑到標眼水

形象百變的林盛斌（阿Bob）早前拍攝的皮膚護理用品曼秀雷敦廣告，於前日在網上發布，他化身北韓國家領導人、官方電視台主播及平民，七情上面大講港式韓語，其重口味演繹呃Like冇難度。不少粉絲大愛阿Bob寵寵寵真心正；有口痕友則嫌其身形腫脹難入戲！

阿Bob自從為無綫拍攝《老表》系列後，成功由電台DJ變身成為演員，除了在電影圈頗吃得開外，他在老本行司儀界亦接Job停不了，無論大小婚宴、公司宴會等長做長有，亦是無綫不少大騷的御用司儀。今年九月，阿Bob首次擔任《香港小姐競選》大會司儀之一，絕對是近年上位最快的金牌司儀。再者，今年他更首度「升呢」做男一，主演電影《我要發達》，預計電影將於明年公映。此外，由於阿Bob形象入屋，勁「襟撈」的他代言不少廣告，包括乳膠漆、參茸補品專門店及皮膚護理用品等，絕對是財來自有方。

變身北韓女主播

早前，他拍攝的新一輯約分半鐘的皮膚護理用品廣告，於前日正式出爐，廣告片中全部都係阿Bob，一人分飾北韓領導人、女主播及普羅巿民，最吸睛的可算是他疑似反串「北韓第一女主播」李春姬，以鏗鏘有力的播報方式大講港式韓語，單單看到其造型，已經笑到標眼水。阿Bob轉頭迅即變身平民，無論女學生、大叔等全部都是戴上假髮的他，個個為領導人「身痕」而哭聲震天，浮誇動作令網民Like爆，廣告片成功在FB洗版。

阿Bob特地在其FB專頁上載該廣告，更說：「人生第一次拍到爭啲爆血管嘅廣告！做新聞報道員真係好甘！」很多粉絲大讚阿Bob為廣告講對白勁出力，高呼他夠專業真心撑；另一方面，有人則指今輯廣告略嫌過火，整體不及上輯他與貓貓對戲咁過癮！

撰文：Steven

協力：Constance

編輯：黃寶恩

插圖：何樂

設計：Simon