祖兒母愛氾濫 師兄未計劃造人

劉浩龍（師兄）、鄧麗欣（Stephy）及崔碧珈等藝人，昨早冒雨到中環海濱長廊出席「街馬」起步禮，但因天雨關係，師兄無奈要放棄跑五公里賽事。

劉浩龍深夜睇奧運，小睡過後昨日晨早就開工。容祖兒日前探望朱薰及BB女，並上載可愛照片，祖兒被指母愛氾濫，師兄聞言笑說：「我同梁浸浸（鄭希怡女兒）影相都開心啦，不過我哋未有（生B）計劃。（你鍾意小朋友？）鍾意，朋友啲仔女都會自己嚟搵我（玩）。」

祖兒日前在內地演出時，有粉絲舉牌寫上「沒有胸掛念你」，平胸論惹來話題，師兄謂：「有睇過新聞，搞笑性質，粉絲都係支持佢，否則唔會舉牌啦。」

Stephy做女版張家輝

鄧麗欣擔任起步禮嘉賓，她透露近日運動量增加，打排球外，還要為電影練習空手道、拳擊訓練，她笑言連色狼都唔怕。未來會否轉型做打女？Stephy表示：「趁仲有氣力都想試下，可能大家見我打排球知我都有郁動，搵多咗我拍動作戲。」她又透露稍後拍新戲：「杜汶澤要我做女版張家輝，最少操到四嚿腹肌，依家只得一嚿，不過距離十月開戲仲有時間。」

撰文：Pauline

編輯：陳禮恒

設計：梁政敏