30年舊照掀話題 許志安讚五官有進步

許志安和黎明（Leon）一張30年前的舊照近日在網上瘋傳，連安仔也忍不住翻開籠底，搵番同一件Tee穿上身拍照自娛一番。搞笑的是，太太鄭秀文（Sammi）也加入嘲笑行列，指當年安仔個樣十足笠了絲襪五官未張開模樣，安仔倒十分豁達，還說情人眼裏出西施。

許志安昨日出席尖沙咀一間食店任剪綵嘉賓，他的出現少不免又再被追問那張陳年舊照，安仔笑言：「咁依家個樣係咪OK先？佢（Sammi）話情人眼裏出西施呀嘛。」Sammi與安仔識於微時，更不忘讚自己偉大，當年他那副樣子也「啃得落」。安仔又覺得當年個樣有冇問題？他笑言：「最緊要個人有進步，依家都唔係30年前個樣，真係好難得有啲咁無殺傷力嘅新聞，令大家睇完都開開心心。」

搬屋7次舊衫仍健在

最難得的是，安仔再穿起當年那件衫並分享自拍照，他表示那件衫是當年家姐買給他參加新秀面試，他又說能夠入圍並非因為唱得好，是全靠件衫帶來幸運，所以搬屋七次依然不捨得棄掉，平日還會用膠袋包好。安仔又透露，刻下正為巡演操Fit身形，更自爆稍後會相約同事一齊去沙灘。記者笑問是否再穿當年被影到那條白色三角泳褲？他聞言後也笑說：「係着滑浪褲，嗰條泳褲已經畀我逐塊逐塊剪爛攞去燒咗，因為冇咩價值。」

另外，同場的鄧穎芝和吳日言老實不客氣表明想問安仔訂Sammi演唱會飛，還說自小已很喜歡Sammi，可惜身邊沒有南亞裔朋友，無法成功購票，遂希望安仔伸出援手。

撰文：Pauline

編輯：林梓添

設計：鄧俊明