定欣甩拖 Bobby安慰：單身都好開心

劇集《一屋老友記》前晚播映大結局，一班演員歐陽震華（Bobby）、滕麗名、呂慧儀、胡楓及羅蘭等一齊食飯睇電視，卻獨欠剛宣布分手的胡定欣，Bobby和阿滕就有信心定欣會走出情傷。

目前身在英國治情傷的定欣已表示與音樂人陳明道轉為朋友關係，默認兩人分手。前晚她缺席飯局，問Bobby可知道定欣回復單身？他就說：「舊嘅唔去，新嘅唔嚟。拍拖嘅過程唔代表一定結婚，揀多幾個穩陣，太倉卒好危險，我都拍過幾次拖，五隻手指數得晒，係你就係你！」其後，阿滕也說不用安慰定欣，等她返香港再算。

問她可有好男仔介紹給定欣？阿滕笑言：「好hot喎，排下隊先。」突然Bobby插口：「好多朋友都係好男仔，不過呢個年紀仲未結婚就一定係花花公子！時代女性唔一定要老公、男友嘅，單身都好開心，有時結婚係笨嘅。」說罷他又立刻走開。

談到《一》劇大結局收視，Bobby踢爆原本周六播映大結局，幸好監製發揮威力，安排在周日播映，希望更多觀眾安坐家中收看。他說：「其實32點已經心滿意足，福將都要靠其他人產生化學作用嘅。」最終，收視最高一刻達32.45，為劇集畫上完美的句號。

結局收視32點

阿滕明日起程到馬來西亞工作，她正擔心最強颱風襲港，會影響航班升降。對於監製有意安排《一》劇演員在九月到東南亞等地拍攝旅遊特輯，順道工作於娛樂，阿滕表示稍後有工作在身，不過中間可以騰出空檔跟大隊會合。呂慧儀就說九月份「蟹子」已經開學，不過她離開短時間應該無問題，又大讚「蟹子」已是個很獨立的BB。

採訪：Pauline

攝影：Lego

編輯：林梓添

設計：梁政敏