《公公出宮》4子開胸Man番晒

《公公出宮》將於本周日（27日）晚播大結局，一班演員昨日出席「華麗盛裝金玉滿堂」活動，眾演員以華衣美服現身，女藝員當中以陳庭欣的大側透視貼身裙最搶鏡，不過仍輸給「真空」上陣的黎耀祥、蕭正楠、陳國邦和曹永廉四位主角。

昨日活動中，連胡定欣也「埋怨」四子騷胸搶晒女藝員風頭，祥仔就話：「次次都話收視幾高着泳衣，之前我哋講過玩低胸，依家收視有33.4點，就嚟一次catwalk囉，今次係呢個劇最後一次宣傳，都想玩得開心啲。」

談到四個男人「拋胸」擺甫士合照時，Edwin有意無意向身旁的阿廉「鬆踭」，祥仔笑言：「我哋係公公嘛。」有人叫他們再穿少啲，祥仔說要睇大結局收視再決定。

翠如叫Edwin做叔叔

《公》劇大結局安排在周日晚播映，適逢復活節長假期，祥仔表示有少少擔心觀眾外遊間接影響收視，不過對該劇還是有信心，希望衝破40點就最圓滿。一班演員更計劃相約食飯睇大結局，無奈定欣和祥仔當日都要開工。

今日是蕭正楠（Edwin）39歲生日，昨日眾演員在活動尾聲捧蛋糕為他慶祝，向來說話抵死的阿廉口快快說：「祝你年年都過到生日。」Edwin切蛋糕時又刻意劃花蛋糕上阿廉的漫畫造型，兩人互窒相當冤氣。

Edwin被問到會否相約女友黃翠如共慶生日時，他說今年繼續在工作中度過。「近幾年都係生日有錢賺，客戶對我好好。其實我同翠如都會見面嘅，因為近日一齊拍新劇，我會趁生日叫佢順便揸車載我返工，到佢生日我又載番佢啫。」女友會否為他炮製驚喜？Edwin即謂：「無刻意製造驚喜，佢不停提住我年紀大，又叫我『叔叔』，總之未到十二點我都仲係38歲。」

採訪：Pauline

編輯：林梓添

設計：鄧俊明