廿四孝爸爸 華仔：我好關心個女

劉德華、洪金寶昨日在旺角宣傳新片《特工爺爺》，華仔在戲中飾演一位不稱職父親，昨日卻大曬幸福爸爸心聲，強調現實生活中非常關心愛女。

劉德華擔任《特工爺爺》監製及特別演出，他在活動上與洪金寶教100位小朋友打功夫，席上更率先播放華仔主唱的電影主題曲《原諒我》MV，吸引大批市民圍觀。

洪金寶相隔17年再次自導自演，他笑指片中最具挑戰的是「床戲」，他解釋：「我等咗好多年終於有床戲，就係由瞓覺到起身的床戲。」他在戲中與小演員演繹「爺孫情」，問他可會與孫仔合作拍電影？他笑笑口表示：「睇下佢有冇天份。（三代同堂一齊拍？）其實我想佢哋（孫仔）讀書，唔知佢哋鍾唔鍾意拍打戲，畀佢打我就慘了。」

難以代入角色

華仔在戲中是一位不懂得照顧女兒及家庭的父親，問他是否很難代入角色？他說：「好難㗎，我現實生活中好關心個女，戲裏面被老婆拋棄，同現實生活差好遠。」

此外，華仔日前出席無綫金牌監製李添勝榮休晚宴，跟曾傳不和的陳少霞「破冰」合照，華仔反問：「我同佢有嘢咩？（你講過唔想再見呢個人？）我真係有講過？唔記得，完全冇任何問題，我都係睇報紙先知。」

採訪：倪小珊

攝影：Lego

編輯：陳禮恒

設計：鄧俊明