與Eddie分手仍是拍檔 朱慧敏：暫時只諗工作

已獲得廣東網絡廣播電視台娛樂頻道十年營運權的「好娛樂台」，其大股東冼國林及頻道總監鍾鎮濤（阿B）昨日舉行盛大記者會，獲邀的嘉賓亦陣容鼎盛，包括溫拿、曾志偉、梁家輝等，其中朱慧敏和彭懷安雖然已分手，但仍是生意拍檔，更不排除復合可能。

朱慧敏和彭懷安（Eddie）昨日前後腳赴會，記者要求兩人合照時，他們亦大方走埋一齊影相，甚至接受訪問，被問到目前的關係，兩人異口同聲表示：「我哋嘅關係係生意上嘅拍檔，嚟緊二月中會開第六間分店。」朱慧敏表示：「我覺得做人最緊要開心，今日嘅我打倒昨日嘅我，除咗工作，依家我乜都唔會諗。」Eddie亦相當配合：「依家我都係忙舖頭嘢，要聯絡佢都係想畀佢知道公司嘅發展動向。」但他們曾是情侶，更去到談婚論嫁階段，將來會否再走一起？Eddie就話：「一切隨緣啦！」

梁家輝向阿B「搲」溫拿飛

說回記者會上，一眾嘉賓上台時，梁家輝笑言除了來恭喜阿B，還代表梁氏家族在眾人見證下向溫拿及阿B訂票，志偉即潑冷水笑謂：「多數訂十張只會畀兩張。」家輝笑言這麼大場合不會托他手踭吧？阿B即一口答應。與此同時，溫拿的《溫拿精神》成為該台《勁歌王》一月份的冠軍歌曲，志偉即笑說：「一睇就知道呢個台幾黑暗！」

冼國林透露將斥資15億人民幣打造歌影視全方位娛樂節目，歡迎其他媒體合作，他透露將親自監製100集網劇《葉問那些年》及100部網絡電影，預算三月推出。阿B坦言從未做過總監，以個人多年經驗，爛船都有幾斤釘，認為只要好過以前就得。

提到有報道指陳嘉桓（Rose）因顧住拍拖觸怒冼國林而被雪藏，冼澄清絕無其事；Rose就否認拍拖，她說：「我係『被拍拖』，係有朋友了解中，但未成事，之後忙工作先。（你公司未來嘅製作都無你份喎？）係咩？竟然！其實公司簽咗新人，要畀機會，我會以客串身份去支持新人。」

撰文：Pauline

編輯：黃寶恩

設計：梁政敏