外隊來港踢波熱

「上星期有冇睇曼聯對香港？香港隊竟然入了一球！真厲害！」午飯時，阿美一邊碌電話一邊吹水。
「聽聞曼聯今季炒咗領隊後成績唔好喎！」Shirley答道。
「哎呀，睇波唔好做勝利球迷。球隊成績有高有低，如果個個都只支持贏家，點會有精彩比賽？」旁邊的Joyce表示不同意。
「啱呀！我雖然唔係追得好貼，不過從細就已經有睇曼聯。」阿美話。

原來阿美細個同屋企人去英國旅行，其中一個行程就是去奧脫福睇波，自始就會留意曼聯的新聞。阿美話曼聯自從傳奇教練費格遜在2013年退休，加上英超的競爭愈來愈激烈，曼聯的成績已經無以前咁漂亮。今季一度打到歐霸盃決賽，但結果輸了俾熱刺，更失去下年的歐冠參賽資格，從天堂跌落地獄。即使如此，曼聯始終都是全球最多球迷的隊伍之一。香港人多睇英超，曼聯迷的比例就更高。球迷出了名「長情」，很少會有人因成績改支持其他隊。

阿美話時代廣場就借這次曼聯到港，在中庭擺了個曼聯展覽，展示曼聯球星的實戰波衫和裝備，包括球王C朗拿度波衫。曼聯前門將雲達沙更加到了現場，吸引很多人拍照和打卡，可見曼聯仍然有一定吸引力！

（本欄逢星期一、四刊登）