自願醫保保唔到

「喂！我諗緊係咪應該買定自願醫保，你哋點睇？」阿美在下午茶時間問同事攞意見。
 
「點解突然諗買保險？唔似你喎」Shirley答嘴。

「冇呀，只係近來見到有唔少宣傳，叫人買自願醫保，所以想知自己係咪應該買。」

一向精明的Amy說：「你供唔供得起先？」

Amy解釋，自願醫保雖然是政府推薦，但始終都是由保險公司承保。保險公司唔可以蝕錢，所以保費也會隨著年紀而上升，投保人如果有某些疾病，該疾病又會不受保。Amy 又說：「我識得一個有抑鬱症的人，想買自願醫保都被拒絕申請。而另外一位本身有三高，去到81歲，醫療保費去到一年十幾萬！」

「吓！一年十幾萬我俾唔起喎！」

「咦，但點解我之前聽講自願醫保可以保到100歲？」Shirley問。

「你一早買又供得起咪可以保到100歲囉！而家最慘係嗰啲長者，之前唔識買，而家六七十歲至知自願醫保呢樣嘢，病痛點都多啲啦，唔知可以保到乜嘢！」Amy又說。

講完一大輪，聽到我頭暈！自願醫保本來是為了減輕政府醫療負擔而設，可是對基層來說太貴，中產買得起但長期疾病又唔受保，至於富裕的階層，本身就不用買自願醫保。究竟自願醫保有什麼是保到，有什麼是保不到？最終也得不出結論。如此混亂，都不知道自願醫保和普通醫療保險有什麼不同，有什麼優勢！

（本欄逢星期一刊登）