慈善飯局的華麗菜單

上星期閨密問我得唔得閒陪佢去「童心共饗」慈善飯局？佢傳咗當晚嘅菜單畀我。嘩，睇到我即時飯應！

當晚菜式豐富，計有︰肘子野生水鴨燉瑞裙鴿蛋湯、舊水札花膠扣乾鮑、官燕竹笙卷伴羊肚菌、清蒸法國籃龍蝦、炸蠔仔春卷拼鵝肝多士、經典樟茶鴨、焗釀花膠筒！

勁哩！未算！仲有來自馬來西亞，被當地人譽為淡水魚王嘅「忘不了」。嗰日嘅「忘不了」用咗清蒸、炸鱗及炒蛋三吃，太吸引喇！甜品係用20年陳皮煮蓮子桃膠無花果燉甜湯，仲有貢棗王糕㖭！

所有食材都好珍貴，加上由唯靈前輩稱嘅「一哥真徒」李文基總㕑烹調，而家淨係講番啲菜式，都口水流呀。

精采一浪接一浪，有得食又有得拎。每位賓客仲獲得陳年嘅陳皮，同埋由石鏡泉先生捐贈嘅花膠、奧運紀念普洱茶餅，佢仲捐出珍貴嘅紅酒作拍賣，真係非常有心。但係我就非常無心，只係貪心食好嘢，呢個慈善係做乜自己之前乜都唔知，實在羞愧。

其實今次晚宴係為咗於1957年成立嘅非牟利機構「香港學生輔助會」籌款，佢哋為缺乏家庭照顧嘅兒童及青少年提供住宿外，更重要係幫佢哋喺品格、情緒、行為等各方面有良好嘅發展，令佢哋可以得到關懷同愛護，發展潛能，健康快樂咁成長。

喺飯前，當我睇到呢班年輕人為我哋表演時，我竟然感動到流眼淚，因為佢哋可以得到栽培，將來成為我哋嘅棟樑。講到呢度因字數有限，佢哋嘅感人故事，只好留待下期再續。（本欄逢周四刊登）