情緒健康影響免疫系統

要keep住洗手防病毒，我洗！要keep住𠺘口防病毒，我𠺘！要戴兩個口罩防病毒，我戴！洋蔥素、綠茶素、薑黃素、維他命C、維他命D、益生菌、大蒜等等，食咗可以增強免疫力防病毒，我食！

喺呢段非常時期，身邊好多人都中咗招，大家步步為營，如驚弓之鳥，四方八面嘅負面新聞令人意志消沉。你想努力抵抗病毒，但如果時時刻刻都將自己嘅情緒推至崩潰邊緣，咁就食乜都無用。要維持免疫系統良好運作，精神壓力不止影響內分泌，仲會降低淋巴細胞的免疫作用。

加拿大心理學家漢斯‧雪萊發現腦下腺係管控內分泌系統中樞，對處理環境危機扮演關鍵角色。遇到危機或壓力時，腦下腺會發出訊號，請腎上腺及其他內分泌腺釋放荷爾蒙來捍衞，呢類賀爾蒙不但會調整對危機及壓力嘅反應，亦會令免疫系統作出適當反應。當精神壓力超標時，內分泌系統亦會應付唔到，造成免疫力下降。長期慢性精神壓力的確會減少體內抗體嘅製造，並降低淋巴細胞嘅免疫功能。

食開煙或飲開酒嘅朋友，喺屋企隔離期間無所事事而煙不離手，酒不離口，咁就弊喇！攝取酒精過量會令免疫細胞好似飲醉酒一樣郁唔到，唔可以對抗細菌或病毒。酒精中毒時，T細胞以及B細胞功能失調，對細菌或病毒的免疫攻擊變得遲鈍無力。慢性酒精中毒者的免疫力大減，對感染的抵抗力也變得很脆弱，感染肺炎、肺結核等的機率大增。

香煙會干擾免疫細胞功能，降低吞噬滅菌嘅能力，而T細胞失調會引起免疫性發炎，局部發炎擴散，導致嚴重慢性肺部及氣管發炎，甚至呼吸困難。喺呢段時期，真係唔好喺免疫系統上百上加斤呀！

（本欄逢周四刊登）