7-11蠟筆小新主題店 用濾鏡影相上傳社媒贈貼紙

調皮搗蛋嘅蠟筆小新又有新搞作！黛安收到風，小新即日起將帶同一班親朋好友登陸7-Eleven，兼反轉鰂魚涌、尖沙咀、將軍澳3間指定分店，變身主題概念店，畀小新裝扮成打卡熱點，每個角落都布滿小新、廣志、美冴同一班好友嘅趣怪表情包同打卡牆，無論大人細路見到都會好開心。

公關姊妹話，下星期二（11日）前，只要喺指定時段到達概念店，並用獨家限定《蠟筆小新》濾鏡影相，將相片上傳至社交媒體並標註@7ElevenHK，即可獲贈特製嘅「Let's take a brick！」靜電貼紙1張，數量有限，送完即止㗎。

概念店除咗會發售多款《蠟筆小新》限定精品，亦會推出3款限量版小新連回力車。即日起至6月8日，喺7-Eleven分店買滿$20就送印花1個，6月11日前憑6個印花再加$40，就可換購1款限量版小新連回力車喇，大家快啲去7-Eleven掃貨，儲夠印花就可以帶小新返屋企㗎喇。