【買樓投資】湯洛雯逆市斥近半億買別墅 黃心穎加港兩地孭3層樓

港姐出身、近年備受公司力捧嘅湯洛雯（靚湯），2012年憑處境劇《愛．回家》成功入屋，其後拍綜藝節目《學是學非》人氣急升。直到2017年，靚湯終於喺《燦爛的外母》中登上女一之位。同羅天宇甩拖後，曾肥到被公司勒令修身，近月減肥成功狀態大勇，勤力又自律嘅佢自然得公司錫到燶，仲成為廣告客戶寵兒，接Job冇停手！

有指吸金力超強嘅靚湯最近購入豪宅做業主！據土地註冊處資料，馬鞍山雲海別墅Lily Avenue單號別墅，以4,581.32萬元登記售出，登記買家為湯洛雯（TONG LOK MAN）。據了解，單位面積2,161方呎，另連花園、天台、梯屋及65平方呎露台及車位，部分洋房另設有平台，呎價約21,200元。而新買家付樓價5%臨時訂金後，4年內只需分期付樓價12%，其餘83%樓價可於5年後才繳付。

靚湯直認逆市入手別墅：「其實自己一直都係同屋企人住，亦好希望屋企人可以住得好啲、舒服啲。新地方係一家人夾份買，唔係我一個人負責供晒，不過以後要更加努力工作。」問到今次選擇先住後供，是否睇好樓市？她說：「我唔係好識呢啲嘢，因為我唔係投資，係自住。」孝順又叻女，抵佢咁受歡迎！

黃心穎加港兩地孭三層樓

同人唔同命，同靚湯一齊做女主角拍《丫鬟大聯盟》嘅黃心穎，因「安心偷食」事件而一直停工，仲避走美國8個月。未「爆煲」前佢喺海外同香港都購置咗物業，2017年以850萬元購入啟德天寰一個500呎的單位，9月正式收樓，如今仍需每月供樓，在無工開的情況下，經濟面臨困境，有指她日前高調返港正係想鋪路復出。除咗啟德天寰，黃心穎仲供緊位於油塘嘅Ocean One，加上同家姐黃心美以420萬港元，喺加拿大溫哥華買咗一個600呎單位連車位，加、港兩地孭咗總值逾1,200萬物業，零收入嘅佢都咪話唔頭痕。

{{hket:inline-image name="114.jpg"}}{{/hket:inline-image}}

（東星娛樂）