走進「粵光寶盒」市集 體驗懷舊中秋節文化

話咁快下個星期就係中秋節，又係時候搵節目喇！黛安聽公關姊妹講，饒宗頤文化館《潮蒲饒館》由下星期五（13日）起，一連3日將會舉辦「粵光寶盒」中秋市集嘉年華暨饒宗頤文化館開放日，仲會以「粵語」同「舊時光」呢兩個地道元素做主題，舉行連串手作市集、特輯展覽、工藝及親子工作坊等，陪大家度過不一樣嘅中秋夜！

黛安知道，兩個配合主題嘅限定特輯展覽，分別有「粵光寶盒」粵語展覽同「紙裏時光—舊時x舊紙本」，前者以香港人嘅母語廣東話為重點，團隊仲特意設計咗啲文字卡，為大家介紹一些「識講」又未必「識寫」嘅粵語，好似「虢礫緙嘞」（音：極力卡勒）等，玩之餘又學到嘢，仲有填字遊戲、粵語大電視和粵語扭蛋機等。

展覽同時誠邀「香港收藏家協會」合作，借出100多件珍罕嘅歷史紙本，包括40至70年代各種生活票據、50至60年代嘅學校讀本同習字簿、飛機票、電車票、戲票、甚至傳統茶室嘅點心紙等，從薄薄嘅片片紙張中，見證紙短情長。

60幾位來自香港、台灣等不同風格嘅手工藝匠，亦會齊集現場舉行手作市集，兼有埋配合中秋節日嘅月夜星願燈、雪月燈籠、紙上月兔中秋剪紙等工作坊。

另外，現場布置有3米高嘅巨型月兔、月亮裝置同「光之路」等打卡位，大家到時仲可以喺園區尋找玉兔蹤影，解出掛喺身上嘅燈謎，即有機會獲得價值1,888蚊嘅「文化旅館‧翠雅山房」套房住宿一晚或其他豐富獎品，節目咁豐富，記住唔好錯過喇！