D2 Place中秋市集 化身日式祭典

話咁快又到8月尾，距離中秋佳節又近一步喇！中秋節除咗賞月、食月餅等傳統慶祝活動外，其實仲有好多新玩意㗎！黛安知道，麥田捕手假日市集同D2 Place下個月將會舉行為期2星期嘅中秋祭典「秋日文化祭」，到時將有過百個本地手作品牌進駐，現場會有手工木藝、手工皂同手工飾物等，而且有唔少工作坊，有嘢玩又有嘢學！

黛安問過公關姊妹，佢話呢個「秋日文化祭」喺9月7號至15號期間、連續2個周末舉行，場內除咗創意市集同工作坊之外，仲有多個小食攤位，提供日式小食同飲品，好似鹿兒島和牛粒、築地玉子燒、幸福煎餅等，仲可以租埋和服浴衣，同家人、朋友齊齊扮日本人漫遊秋祭，感受日式廟祭體驗！

為咗迎合中秋節主題，D2 Place更專登將天台打造成一個和式亭園，以古典石板路引領大家走到「巨型月亮」前，影靚相同打卡一流。旁邊仲有個水燈許願池，別出心裁以半圓設計圍繞住巨型月亮，展現出百燈伴月嘅景象，應節又浪漫。咁吸引，大家記住唔好錯過喇。