美國的種族歧視

上星期我聽新聞，報道特朗普公開批評四位非白人女性的民主黨國會議員︰「滾回你來的地方！」仲侮辱她們是來自世上最糟糕、最腐敗的國家，雖然特朗普一向口出狂言，令人見怪不怪，但今次當我聽到這番種族歧視言論，都無名火三丈起！口口聲聲講民主的美國，種族歧視卻一直存在。

今年三月，我去西雅圖進修的第一晚，和同學們去一間湖邊餐廳食蠔飲香檳，好開心，於是我們決定過兩日再去。

當我打電話訂位時，職員問我們要畀服務員20%小費有無問題，我話無問題。到晚飯前三小時，餐廳打電話來確認座位時，再提醒要畀小費20%，我們仍說無問題。

當我們去到餐廳，門口帶位的女士帶領我們去座位，招呼我們張枱的是一位皮笑肉不笑的白人女服務員。當我想先點一些開胃酒時，佢冷冷咁話點酒要出示護照，我繼續微笑有禮貌地跟她說，前日我們來叫酒的時候，另一位服務員無問我們攞護照。這位白人服務員，即黑口黑面話，有護照才能叫酒。當時有修養的同學安撫我，話無所謂，我們之後再去其他地方飲酒啦。諗諗下兼睇睇下，個白人對其他白人顧客和顏悅色，反之對住我們就帶有歧視表情，我即刻火都嚟。於是同八位同學講︰「我哋走！做乜要畀錢嚟受氣？」

當我見到她的經理時，同佢講︰「你囗囗聲聲提顧客畀20%小費，但你哋嘅服務態度連2%都唔值得畀！」

在美國，仍然有些白人不能忍受見到中國經濟崛起，不能面對他們一直認為是窮人的黃種人，而家好多都變得比他們更富有。

當遇到這種種族歧視的對待時，慶幸我可以隨時有尊嚴咁拂袖而回，而唔係畀人叫我滾回自己的地方！

（本欄逢周四刊登）