電子動畫《清明上河圖3.0》 暑假登陸亞博館

藝術結合科技，曾風靡全城的電子動畫版《清明上河圖》，嚟緊又有得睇喇！黛安知道，由今個星期五（26日）起至下個月25日，亞洲國際博覽館將會有一個《清明上河圖3.0》數碼藝術展，以嶄新科技糅合藝術、文化元素，將《清明上河圖》以升級版本再次展出。港鐵仲會提供乘搭機場快綫小童免費、長者半價同成人特別優惠，真係不能錯過啊！

黛安知道，升級版《清明上河圖3.0》動畫稿喺由20幾位畫師合力花咗400幾日手工繪製，再配以超高清技術，投影喺一幅近5米高、30多米長嘅巨幕畫軸上，比起上次電子動畫版嘅展覽，更加細緻。呢個展覽仲有另一個焦點，就係「汴河碼頭」球幕影院，180度嘅影片採用一鏡到底嘅技術，呈現汴河日與夜嘅景象，畀參觀者躺在椅上，恍如置身汴河小船。

今次展覽仲包括首次喺香港亮相嘅「開放之城」同「宋『潮』遊樂園」，後者設置咗多項闖關任務，等大人小朋友透過體驗同遊戲了解歷史，猶如穿越至宋代，好睇又好玩！。