新加坡航空全新商務中餐 歎米芝蓮廚師手藝

黛安噚日出席咗新加坡航空嘅升級商務艙中式膳食發布會，仲撞到《經濟日報》及《晴報》社長麥華章，一齊品嘗到米芝蓮一星廚師主理嘅菜式，簡直令人回味無窮啊！

今次新加坡航空推出全新嘅「食全味美」中式餐膳，係由米芝蓮一星廚師、新航國際烹飪顧問團成員朱俊打造，包括小食、頭盤、主菜同甜品等。喺香港航綫，商務艙客人可以食到「南瓜百合」小食，頭盤有「醬汁蝦拌蔥油小瓜」或者「海鱸魚配椒麻豆腐」，之後主菜有「香糟五花肉」及「燻鴨胸和炒蘆筍」，再配搭米飯或者麵食做主食。最後甜品有女士最愛嘅「柳橙雪蓮」或者「柳橙胖大海」。

主理嘅朱師傅就厲害啦，佢曾經喺法國同意大利接受烹飪培訓，2009年加入新航國際烹飪顧問團，依家仲係蘇浙滙餐飲集團副總裁兼首席技術官。佢經常研發新菜式、烹飪技巧，個個食過都讚不絕口。

朱師傅話，中餐空膳嘅工藝比西餐複雜，喺陸地餐廳中菜係由廚師一氣呵成烹煮而成，但空膳炮製過程就有停頓，唔想食物質素不保，就需要鑽研工藝嘅對接，航空餐係有好深學問。

新航分區副總裁（客艙服務與設計）黃碧瑜（Betty）同新航香港區總經理謝昭琿噚日都有出席，Betty話，「食全味美」體現到新航嘅創新精神，同不斷精益求進。今次新推美食，可以喺新航來回香港同新加坡，以及廣州、上海同北京來回新加坡食到㗎。