「你比想像中美」 Dove廣告半億人點擊

噚日講到品牌價值的重要性，唔知大家有無睇過一段叫「Dove Real Beauty Sketches」嘅網上短片？片段係美國個人護理產品牌子Dove嘅廣告，多月前上載YouTube，至今已多逾5,400萬人點擊，歷久不衰。黛安看後也深被觸動，印象至今難忘，敢說是成功宣傳品牌價值的表表者。

段片並無推銷任何Dove嘅產品，只有一個信息—You are more beautiful than you think（你，遠比自己想像中美麗）。一個咁簡單嘅信息，點可吸引半億人收看？Dove一向將inner beauty（內在美）定為其品牌價值，呢段短片用咗一個有趣方法傳遞呢個信息：首先佢哋搵咗一個素描專家坐喺房中央，旁邊有一塊布簾同一張凳，然後陸續有女士入嚟，畫家叫佢哋描述自己嘅容貌，然後按佢哋所形容嘅，幫佢哋畫人像畫，完成後講聲Thank you就走，過程冇看對方一眼。

別人眼中的自己

故事未完，女士離開後，另一人坐低，係女士新相識嘅朋友，佢哋重新向畫家描述朋友嘅外貌。畫家發現，同一副容貌，朋友嘅描述往往比女士本人形容得靚：漂亮嘅眼睛、可愛嘅鼻子……

片末畫家將女士帶返房間，欣賞兩幅截然不同嘅畫作。女士很驚訝，原來人哋眼中嘅自己，竟然係咁親切、動人。「我哋花咗很多時間，試圖改變一啲冇大問題嘅事；其實應該用更多時間，去欣賞我哋喜歡嘅事。」一個人應學懂欣賞與生俱來嘅自然美，因為咁影響你對所有事嘅觀感，亦影響你係咪快樂。

Dove所傳遞嘅品牌情感，成功跨越地域、種族界限，觸動萬千網民，又係一個成功用數碼推廣品牌價值嘅實例。