王利民孖莊偉忠食素 出cookbook教冬瓜扮扣肉

提起「素食」會否聯想到淡而無味？不過有一位熱愛煮食的上市公司主席，卻將平平無奇的素食變身為色香味俱全嘅菜式，呼籲大家奉行多菜少肉原則，投入健康環保飲食生活。

佢係邊個？咪係康宏主席王利民（Quincy）囉！繼去年出版首本個人食譜《主席‧煮食》大獲好評，今年Quincy再出新書《主席‧煮意》。黛安打過去畀Quincy，佢話新書主打一餸兩煮、中西合璧，分為葷素篇和包含肉類嘅中外食譜。

舉例客家菜「梅菜扣肉」，畀人肥膩感覺，食完好有罪咎覺，所以Quincy就以冬瓜代豬肉，配搭鹹香梅菜自創出「梅菜扣玉」，一淡一濃，惹味又啱送飯，真係創意爆燈！

太太試菜 多次改良

新書有42道菜式，Quincy話全部都係自創，仲多謝太太同朋友冒「生命危險」試菜，畀意見經多次改良，先可以成功出書。佢認為，並非要求大家戒肉，但多菜少肉不但對自己健康，甚至地球均是好事。

Quincy又透露自己患心臟病，所以較注重健康，前排佢仲孖住啱啱做完「通波仔」手術嘅康宏CEO莊偉忠一齊去食素，交換咗唔少健康心得𠻹！